SUCIULUGIA DI A CORSICA…

A suciulugia ha par scopu primurosu di circà spiegazioni à ciô chi si po osservà par definisci ni a natura sociulogica. Chivi, par via d’issa prova, cumu a sucità corsa s’hè missu in ballu, s’hè trasfurmita inghjenerendu i so caratteristichi tandu plurali chi cumplessi. L’autori tenta di purta ci ‘nant’a i tratti e i mutazioni suciali intarvinuti in Corsica. Si l’eserciziu pari interessenti, cintrà l’analisa à u mumentu induva a Corsica diventa francesa limiteghja tandu a ricerca. Incu po dassi u scopu di rilativisà una certa manera di cuncipì u patriottisimu corsu.


Corsica francesa


Principia l’autori incu ‘ssa dumanda scelta:”Peut-on dater l’entrée de la Corse dans l’espace français ? S’agit-il du 15 mai 1768 lors du traité de Versailles, par lequel Gênes abandonne de façon provisoire sa suzeraineté ? Ou bien du 8 mai 1769, date de la défaite de l’armée de Paoli contre les troupes françaises à Ponte Novu? Ou enfin du décrêt du 30 novembre 1789 qui proclame la Corse partie intégrante de la monarchie française, alors que la Corse compte désormais des députés élus ? Una scelta chi dà i cuntorni di l’analisa sociologica chi metta d’accantu l’evuluzioni di a sucità corsa prima di a cunquista francesa.


Corsica tarra d’immigrazioni


Priuriseghja l’attratività isulana, paragunandu a Corsica à d’altri rughjoni meridionali francesi scuzzulati da scunvulgimenti dimugrafichi. Tandu l’isula induva “les données géographiques apparaissent aussi structurantes” saria piuttostu un tarritoriu chi si truvaria allura “dans une situation de marginalité relative”. E di situà una cummunità paisana frutta di “une société en mosaïque”. Hè d’issa sucità chi l’autori sottulieneghja i ” francesi fora, arabi fora, abrei fora”. Ma pocu e micca d’esami di u pesu di sfarenti cunquisti militari intarvinuti seculi e seculi ramintendu a rialta d’un populu sempri duminatu e mai suttumissu…


La petitesse de l’ile…


In fattu di a Francia ni dici ch’idda ha purtatu par via di l’impurtazioni monda bè. Chi da puntu di vistu ecunomicu a Corsica un ha nunda da venda e chi u so marcatu internu hè piu chi limitatu. Tandu l’autori parla de “petitesse de l’île”, mittendu d’accantu a pulitica di dipindenza imposta da l’ultimi cunquistadori…O mittendu in valori a valorisazioni di i tarra à pro di i fughjiticci di l’Algéria francesa, aghjunghjendu chi “les corses manquaient d’énergie et devraient être relayés par des populations moins fatiguées”. Andendu piu luntanu, asseriscia chi à malgradu u Statutu Particulari, “la rhétorique développementiste ne cesse de se heurter à des contraintes structurales”. Eppuri scrivi chi à mumentu sceltu, “la question économique précède alors la question culturelle”, appughjendu a so argumentazioni ‘nant’à l’analisa di i dui tendenzi chi tandu asistiani in cori di u muvimentu naziunali:quidda di u parè sucialistu incu u Fronti Righjunalistu Corsu (FRC) e quidda di u parè piu liberali di l’Azzioni par a Rinascita di a Corsica (ARC).


Un naziunalisimu chi faci rida…


L’autori un hè cunvintu di i radichi storichi di u naziunalìsimu corsu. Paragunendu tandu i cundizioni di a nascita di u Fronti di Libarazioni Naziunali di a Corsica incu u Fronti algerianu, arguminteghja chi u primu un ha nunda da veda, aghjunghjendu ch’iddu hè dinò l’ughjettu di magagni in Francia…Par illustrà appena i sò ditti, pida un asempiu tiratu di u libru di Francescu Santoni() induva parla di cunfaranza stampa niguziata incu u Statu francesi…D’altrondi sottulinieghja chi i formi di viulenzi i piu duri sò stati impiegati tra naziunalisti stessi e à l’internu… A clandestinità di l’ambivalenza Di a viulenza “clandestina”, a mischia incu a criminalità urganisata e u puliticu, appughjendu tandu nant’a “spulitisazioni” di u Fronti di Libarazioni Naziunali Corsu. Pratenda chi ssa viulenza hè piuttostu impiegata par rigulà affari privati a bulichendu incu u mezzu e u so pesu à impona attività ecunomichi illiciti. Una certa manera par l’autori di cuntestà i fundamenti rivoluzionari di i strutturi chi si rivindicheghjani di u cuncettu di a Lotta di Libarazioni Naziunali. Mittendu à tempu in rilievu u sistema clientelistu chi fà nasci un rapportu paradussali incu u Statu Francesi, à quandu troppu vicinu, à quandu alluntanatu… Un paradossu chi si pudaria ritruvà ancu ind’é u sustegnu à Ivanu Colonna mischiatu à a riprubazzioni popularia contr’à l’assassiniu di u Prifettu Érignac mittendu in rilievu a difficultà di capì i mecanìsimi antropològichi d’issa ambivalenza…

A fàbula di l’identità

Ricuniscendu quantunqua à tempu l’opara di u Riacquistu culturali e linguisticu, sfrisgendu à tempu a so purtata,scriva chi ss’opara fù un “moment effervescent de la vie sociale en Corse, qui bouleverse les hiérarchies et mobilise les énergies”.Ma cuncluda in una fàbula d’identità…Pida l’asempiu di a lingua corsa, sminticata da a storia, ma sustinutu tandu duranti a perioda fascista (s’appoghja nant’à i studi di Gino Bottiglioni). Raghjunghja chi ci so tandu dui niveddi di lingua, u talianu par a cumunicazioni ufficiali e u dialetu par a vita cutidiana. D’issa specificità di a lingua ni riteni quantunqua chi a leggi Deixonne un ni parlaia parchi c’era un risicu irredentistu… Una manera di dì chi a rivindicazioni “naziunalitaria” purtaia u pesu di a so ancurera à a strima dritta… Ramenta dinò chi u Statu he sempri statu uppostu à a missa in ballu di u bilunguisimu.

Par concluda…

Un sarà tantu difficiuli di scriva chi l’autori incu ss’analisa sociologica di a Corsica infirma l’auguri di l’opara di Pasquali Paoli chi tandu d’issu tarritoriu isulanu ni vulia fà un asempiu di Statu Naziunali,circhendu par asempiu à fàla finita incu i ricorsi à a ghjustizia privata chi insanguinaia e avvilinaia a sucita corsa di l’epica e chi oghji chi ghje oghji ni pata sempri effetti…Al di là di l’imaghjini sughjettivi discritti da l’autori, chi metta in rilievu i so limiti scelti par aventurassi in un pratesu studiu socioligicu chi manc’una volta s’appughja nant’à i radichi civilisaziunali agru pasturali corsi, ci sò quantunqua certi puntati chi musciani bé u rinversciu di a sucità attuala e i cumportamenti umani à l’antipodi di i nosci valori sempri affissati. Ancu u Muvimentu Naziunali un hè à l’agrottu par via di certi attitudini chi si ritruvani ind’e quidda di ssi calchi capi africani chi ribelli pratesi, si tichjani sempri nant’à u spinu di l’ordini culuniali, e di u so populu… Un libru assai limitatu e dubbitosu par u so scopu ricircatu e chi dà chi un scarsu aspettu sociologicu par capì l’azzioni e i rapprisentazioni suciali da quali s’he custituita a sucità corsa e chi un s’he custruita incu a cunquista francesa…Si saria purtroppu trasfurmata in un sensu prupiziu à l’ordini culuniali chi l’autori un po piattà incu a so scelta appughjata di i “derivi naziunalisti”. À leghja par quiddu chi vo capì l’ubbietivu parseguitatu da l’autori.

Ulivieru SAULI

()-Pour solde de tout compte.

Laisser un commentaire

Votre adresse e-mail ne sera pas publiée. Les champs obligatoires sont indiqués avec *