UNA DONNA LIBARA

Livia Leca ghjovana pastora di 25 ani in Guagnu sustena à dimarchja Core In Fronte.

In ssi tempi di campagna aliturali ugnunu circa à alliscià i sò putenziali alittori. In ssu quadru, diventa impurtantissima a cummunicazioni par via di l’imaghjina o di u ritrattu d’una parsona scelta. Ancu i culori participeghjani à sfilivà. Di fatti hè una strategia chi si metti in ballu, circhendu par certi à fà valè u sò missaghju o i sò pruposti, e par altri à fà sminticà o sminuì i sò rispunsabilità d’una situazioni vissuta.
A scelta di a donna, o ancu di una bella donna entri in ssu cuncettu dittu valurizzanti di a figura. À chi moscia a donna rispunsevuli e ghjestunaria. À chi metti in evidenza a donna militenta. À chi metti in rilievu a donna di l’emissioni “people” . E ancu, a chi si servi, piccatu, di a donna vera zucca, prisenta par empia un viotu in una lista…
Simu d’issa epica induva u mudellu e a figura pesani monda. E ancu troppu, pirdindu à tempu u sanu dibattitu nant’à u rolu suciali di a donna e l’ugualità di i dritti incu l’omu…
Si sà chi indé noi, a cultura ci ha sempr’insignatu u rolu specificu di a donna, dindu tandu chi ghjè idda “chi faci l’omu”. E chi a donna par monda tempu, in a vita paisana ha sempri accumpagnatu l’omi, occupendu si à tempu di a vita di a famidda e participendu dinò à a vita di i campi.
À u nosciu seculu, ben sicura a situazioni hè monda cambiata. E di vita paisana o pastureccia donna chi si n’occupa ci ne’hè di menu in menu. À u puntu chi, ancu indé certi chi si pratendini naziunalisti, o po essa “novi naziunalisti”, uni pochi si ni ridini d’issa scelta di vita…Scrivu cussì chi l’aghju intesa cussì disprizzevuli :”on ne va pas vivre de chèvres…”. Un asempiu chi moscia à tempu a perdita di i nosci radichi civilisazziunali accentuata da u cunsumarìsimu scemu e a sparizioni di i nosci usi par via di u pesu di u culunialìsimu francesu.
In Corsica l’aghjenti hani sempri avutu un liamu forti incù a tarra. E si pò ancu parlà di leia trasmissa spirituali
Eppuri oghji chi hè oghji, nata in l’arradicamentu incu i ceppi di a vita muntagnola, aghju scupartu à Livia. Ghjovana di 25 anni, hè par via di a trasmissioni famiddiaria chi Livia ha pussutu renda effetivu u sognu di a so ziteddina:campà libara in ambia muntagnola, à mezzu à i so capri e capretti. Da u liceu agricolu di Borgu à quiddu di Sartè, ha passatu e avutu u so Brivetu Prufissiunali Rispunsevuli di Splutazioni agricola. Incù l’aiutu di u merri di u so paesu, Guagnu, chi ha bè capitu u so impegnu, Livia ha pussutu stallà si, e avè a so banda di capri e principià i so casgi e i so brocci. S’occupa dinò d’aiutà u so babbu è a so mamma pa’ l’allevu di i porci è di i vacchi.
Ùn vi sbaglieti chì Livia, incù u so beddu torchjulu, ùn campa taddata da certi rialtà d’oghji. T’ha u so tilifuninu, i so conti “instagram” o “whatsapp” e hè sustenitrici’accanita di a squadra di ghjoc’à ballò “GFCA”. À tempu, ricusendu a superficialità di a vita cutidiana, Livia hé rivultata da ciò chi si vidi oghji in a ghjuventù:disimpiegu, isulamentu, staccamentu culturali e linguisticu, dipindenza à a droga e u sugnacciu di u soldu faciuli …
Livia s’arrivolta di piu ch’idda ha vissutu piu che mali l’assassiniu di un ghjovanu corsu chi l’avvia dinò musciatu a via di l’amori di a tarra. Era par idda comu par monda ghjovani un asempiu di vita e di lotta. Era dinò un amicu. Livia ramenta sempri in u so parcorsu à Massimu Susini, tombu à tradimentu…
Un hè nant’à nisciuna lista chi si prisentani à l’alizzioni tarrituriali. Ma un voli dì ch’idda si n’impippa . A u cuntrariu! Forti di u sguardu di i so 25 anni è di a so riflissioni, Livia ha fattu a so scelta di purtà sustegnu à una dimarchja. Quidda chi porta in cori comu idda, a scelta di l’aghjenti di a tarra, di u sviluppu sanu e di l’eculugia, alluntanati da ‘ssi pusativi chi custumati sminticani a filetta, manghjendu e pinsendu in francesu…
Livia susten’à Cori in Fronti.

Campa felici Livia e chi u to sognu di tarra libara diventessi infini rialtà !

Ulivieru Sauli.

Laisser un commentaire

Votre adresse e-mail ne sera pas publiée. Les champs obligatoires sont indiqués avec *